SPORTS OF TANZANIA

KUTOKA KWA  ABOODMSUNI NA BINZUBERINa Prince Akbar

MBWANA Samatta amefunga bao moja jioni kwenye Uwanja wa TP Mazembe mjini Lubumbashi, wakati timu yake Tout Puissant Mazembe ikiilaza Al Ahly mabao 2-0 katika mchezo wa Kundi B, Ligi ya Mabingwa Afrika.

Samatta alifunga bao hilo dakika ya 49, baada ya pasi nzuri ya Tressor Mabi Mputu, kabla ya D. Kanda kufunga la pili dakika ya 61, pasi ya Mputu tena. Thomas Ulimwengu aliingia dakika ya 67 kuchukua nafasi ya Kanda.

Mbwana ni mchezaji tegemeo wa kikosi cha kwanza cha Mazembe kwa mwaka wa pili sasa, lakini Ulimwengu alipandishwa kikosi hicho kwa mara ya kwanza mwezi uliopita, baada ya kukaa kikosi cha wachezaji wa akiba tangu asajiliwe katikati ya mwaka jana na leo amecheza mechi ya kwanza.

Mazembe imefikisha pointi10, baada ya kucheza mechi tano, kushinda tatu, sare moja na Berekum Chelsea na kufungwa moja na Al Ahly ugenini,

Al Ahly iliyotoa sare ya 1-1 na Berekum Chelsea nchini Ghana katika mechi yake iliyopita, bado inaongoza kundi hilo kwa pointi zake 10, wakati wababe wapya wa Ghana wanashika nafasi ya tatu kwa pointi zao sita baada ya kutoka sare na Zamalek 1-1, ambao wanashika mkia wakiwa na pointi moja.

Sasa Ahly na TPM zinawania uongozi wa kundi ili kujihakikishia kutinga Nusu Fainali kabla ya mechi za mwisho za Kundi hilo, ambazo Ahly watamaliza na Zamalek Cairo na Mazembe watamaliza Berekum Chelsea nchini Ghana

AKUFFO APIGA GOLI SIMBA WAKITOA SARE

Akuffo

SIMBA SC imelazimishwa sare ya 1-1 na City Stars ya Nairobi Uwanja wa Sheikh Amri Abeid mjini Arusha jioni hii, katika mchezo wa kirafiki kujiandaa na mechi ya Ngao ya jamii dhidi ya Azam FC, Septemba 11, mwaka huu, Uwanja wa Taifa, Dar es Salaam.

Kwa matokeo hayo, Simba imeshindwa kulipa kisasi cha Agosti 8, mwaka huu ilipochapwa mabao 3-1, Uwanja wa Taifa, Dar es Salaam na timu hiyo.

Katika mchezo huo, bao la Simba lilifungwa na Daniel Akuffo, wakati Komabil Keita alijifunga katika jitihada za kuokoa na kuwapa Wakenya bao la kuongoza.

Awali, Simba ilicheza mechi mbili Arusha, dhidi ya Mathare United ya Kenya na JKT Oljoro ya Arusha, ambazo zote ilishinda 2-1, mshambuliaji mpya Daniel Akuffo kutoka Ghana akifunga bao moja kila mechi, Kiggi Makaasy na Mrisho Ngassa wakifunga mabao mengine.

Simba inajiandaa na mechi ya Ngao ya Jamii Septemba 11, mwaka huu, Uwanja wa Taifa, Dar es Salaam, ambayo kihistoria hiyo itakuwa mechi ya tano ya Ngao ya Jamii kuchezwa nchini na ya pili kukutanisha timu nje ya wapinzani wa jadi wa soka ya Tanzania, Simba na Yanga.

AZAM WAICHAPA MBILI COASTAL UNION

Bocco 'Adebayor' anasafiri

Na Princess Asia

MABAO mawili ya John Raphael Bocco ‘Adebayor’ katika dakika za 15 na 44, leo yameipa Azam FC ushindi wa mabao 2-0 dhidi ya Coastal Union ya Tanga katika mchezo wa kirafiki kujiandaa na mechi ya Ngao ya Jamii dhidi ya Simba SC, Septemba 11, mwaka huu, Uwanja wa Chamazi.

Bocco alikuwa mwiba mchungu kweli leo kwa safu ya ulinzi ya Coastal, kwani pamoja kufunga mawili, lakini alikosa mabao matatu ya wazi mno. Abdulhalim Humud alitolewa nje kwa kadi nyekundu dakika ya 32 kwa rafu na lugha chafu.

Hiyo ni mechi ya tano Coastal inafungwa kati ya sita za kujipima nguvu ilizocheza kabla ya jana kufungwa 2-1 na Yanga, awali ilifungwa 3-2 na Bandari mjini Mombassa, baadaye 2-0 Tanga, ilifungwa 2-1 na Polisi mjini Morogoro na yenyewe iliifunga JKT Oljoro 1-0.

Kwa Azam hii ni mechi ya tatu mfululizo wanashinda, awali waliifunga 1-0 Prisons ya Mbeya na Transit Camp 8-0.

Azam inatarajiwa kuivaa Simba katika mechi ya Ngao ya Jamii ya kuashiria kufunguliwa kwa pazia la Ligi Kuu ya Vodacom Tanzania Bara, Septemba 11, mwaka huu, Uwanja wa Taifa, Dar es Salaam, ikiwa ni mchezo wake wa kwanza katika historia ya Ngao hiyo.

Kihistoria hiyo itakuwa mechi ya tano ya Ngao ya Jamii kuchezwa nchini na ya pili kuishirikisha timu nje ya wapinzani wa jadi wa soka ya Tanzania, Simba na Yanga.

Mtibwa ilicheza na Yanga mwaka 2009, baada ya Simba kugoma na ikashinda mabao 2-1 na kutwaa Ngao, wakati kabla ya hapo, mwaka 2001, Ligi Kuu ya Tanzania ikiwa bado inadhaminiwa na Kampuni ya Bia Tanzania (TBL), kupitia bia ya Safari Lager, ilichezwa mechi ya kwanza ya Ngao kihistoria.

Katika mechi hiyo, Yanga ilishinda mabao 2-1 dhidi ya Simba na mwaka juzi Yanga iliifunga tena Simba kwa penali 3-1 kufuatia sare ya 0-0 na mwaka jana, Simba ilitwaa Ngao ya kwanza katika historia yake, kwa kuifunga Yanga mabao 2-0.

Ikumbukwe mara ya mwisho Simba SC ilipokutana na Azam FC, katika Robo Fainali ya Klabu Bingwa Afrika Mashariki na Kati, Kombe la Kagame mwezi uliopita Dar es Salaam, ilifungwa mabao 3-1, yote yakifungwa na Bocco na lile la kufutia machozi kwa wekundu hao Msimbazi liliwekwa kimiani na beki mahiri Shomari Kapombe, aliyemajeruhi kwa sasa.